பாதுகாப்புக் காரணங்களை முன்னிட்டு, லண்டனில் நடைபெறவிருந்த தமிழக முதல்வர் சி. ஜோசப் விஜய்யின் நிகழ்ச்சி ஒன்று செவ்வாய்க்கிழமை (15) இரத்து செய்யப்பட்டது.
இந்த இரத்து நடவடிக்கையால், பல மணிநேரம் வரிசையில் காத்திருந்தவர்கள் உட்படப் பல ரசிகர்கள் ஏமாற்றமடைந்தனர்.
நிகழ்வுக்காக செவ்வாய்க்கிழமையன்று லண்டனின் மிக உயரமான கட்டிடமான ‘தி ஷார்ட்’ (The Shard) முன்பாக அவரது ரசிகர்கள் கூடியிருந்தனர்.
ஆனால், பாதுகாப்பு காரணங்களைக் கருத்தில் கொண்டு மெட்ரோபாலிட்டன் காவல்துறை தலையிட்டதைத் தொடர்ந்து அந்த நிகழ்ச்சி இரத்து செய்யப்பட்டது.
விஜய்யின் டிவிகே (TVK) கட்சியின் தகவல் தொழில்நுட்பப் பிரிவும் இந்தக் கூட்ட இரத்து குறித்த தகவலை உறுதிப்படுத்தியது.
கட்சித் தொண்டர்களும் ஆதரவாளர்களும் முதல்வர் விஜய்யைச் சந்திக்க ஆர்வமாக இருந்தபோதிலும், பாதுகாப்பு காரணங்கள் மற்றும் லண்டன் பெருநகரக் காவல் துறையின் கோரிக்கை ஆகியவற்றின் காரணமாக இந்தக் கூட்டத்தை நடத்த முடியவில்லை என்று அவர்கள் தெரிவித்தனர்.
உலகளாவிய முதலீட்டாளர்களைத் தமிழகத்தை நோக்கி ஈர்க்கும் நோக்கில் மேற்கொள்ளப்படும் முதலீட்டு ஈர்ப்புப் பயணத்தின் ஒரு பகுதியாக, தமிழக அரசுப் பிரதிநிதிகள் குழுவை வழிநடத்திக்கொண்டு விஜய் தற்போது இங்கிலாந்தில் உள்ளார்.
முதலமைச்சர் அலுவலகத்தின் தகவலின்படி, இப்பயணத்தின்போது அக்குழு பல புரிந்துணர்வு ஒப்பந்தங்களில் கையெழுத்திட்டதன் மூலம், சுமார் ரூ. 12,300 கோடி மதிப்பிலான முதலீடுகள் ஈர்க்கப்பட்டுள்ளன.
இந்த ஒப்பந்தங்கள், ஆசியாவில் மேம்பட்ட உற்பத்தி மற்றும் தொழில்நுட்பத் துறையின் முக்கிய மையமாகத் திகழும் தமிழகத்தின் முயற்சிக்கு வலுசேர்க்கும் என்றும், 9,400-க்கும் மேற்பட்ட உயர் மதிப்புமிக்க வேலைவாய்ப்புகளை உருவாக்கக்கூடும் என்றும் அதிகாரிகள் தெரிவித்தனர்.
விஜய் தனது இங்கிலாந்து பயணத்தை முடித்துக்கொண்டு இன்று (16) இந்தியா திரும்புவார் என்று எதிர்பார்க்கப்படுகிறது.
