யாழ்ப்பாணம் சிறைச்சாலையில் உள்ள கணவருக்கு, பிஸ்கட் பையினுள் வைத்து கஞ்சா கடத்த முற்பட்ட பெண்ணைக் குழந்தையுடன் கையும் மெய்யுமாகப் பிடித்த சிறைச்சாலை அதிகாரிகள் யாழ்ப்பாணம் பொலிஸாரிடம் ஒப்படைத்துள்ளனர்.
குற்றச்செயல் ஒன்றுடன் தொடர்புபட்டு சிறையில் வைக்கப்பட்டுள்ள தனது கணவரைப் பார்ப்பதற்கு மேற்படி பெண், நேற்றுத் திங்கட்கிழமை (28) மதியம் உணவு தயார் செய்துகொண்டு சென்றுள்ளார்.
இதன்போது, 38 கிராம் 79 மில்லிகிராம் கஞ்சாவினை பிஸ்கட்டுக்குள் மிகசூட்சுமமான முறையில் வைத்துகொண்டு செல்ல முற்பட்டுள்ளார்.
உணவுப் பொருட்களை சோதனையிட்ட சிறைச்சாலை அதிகாரிகள், சந்தேகத்துக்கிடமான முறையில் இருந்த பிஸ்கட் பையொன்றினைப் பிரித்துப் பார்த்த போது, கஞ்சாவைக் கடத்திச் செல்ல முற்பட்டமை கண்டுபிடிக்கப்பட்டது.
மேற்படி பெண்ணைக் கைது செய்த சிறைச்சாலை அதிகாரிகள், மேலதிக விசாரணைகளுக்காக யாழ்ப்பாணம் பொலிஸாரிடம் ஒப்படைத்துள்ளனர்.
