வடக்கு முதலமைச்சருடனான சந்திப்பு தொடர்பில் இதுவரை எவ்வித தீர்மானமும் எடுக்கப்படவில்லை என தமிழ் தேசிய கூட்டமைப்பின் தலைவரும் எதிர்க்கட்சி தலைவருமான இரா.சம்பந்தன் தெரிவித்துள்ளார்.
இவ்வாறு எதிர்வரும் 7 ஆம் திகதி நாங்கள் இருவரும் சந்திக்க உள்ளதாக ஊடகங்கள் மூலமே தான் அறிவதாகவும் கூறியுள்ளார்.
குறித்த விடயம் தொடர்பில் ஊடகம் ஒன்றுக்கு வழங்கிய விசேட செவ்வியிலேயே அவர் இதனை தெரிவித்துள்ளார்.
அத்துடன் வடக்கு மாகாண முதலமைச்சர் என்னைச் சந்திப்பதற்கு கோரிக்கை விடுத்துள்ளார் இருப்பினும் நாங்கள் சந்திப்பதற்கான திகதி இன்னும் தீர்மானிக்கப்படவில்லை. இந்நிலையில் சி.வி.விக்னேஸ்வரன் விரும்பும் நேரத்தில் என்னைச் சந்தித்துக் கொள்ளலாம் என சம்பந்தன் கூறினார்.
கடந்த சில நாட்களாக விக்னேஸ்வரன் மற்றும் தமிழ் தேசிய கூட்டமைப்புக்குள் பிளவு ஏற்பட்டுள்ளது, முதலமைச்சர் வேட்பாளராக தமிழ் தேசிய கூட்டமைப்பில் மீண்டும் போட்டியிட மாட்டார் என பல செய்திகள் வெளியாகியுள்ளது. இந்நிலையிலேயே சம்பந்தன் மேற்கண்டவாறு கூறியுள்ளார்.
