யாழ்ப்பாண வர்த்தக நிலையங்கள் மூடப்படும் நேரத்தில் வாள்களுடன் வரும் முகமூடிக் கொள்ளையர்களை கைது செய்யவேண்டும். அச்சம் காரணமாக வர்த்தகர்கள் இரவு 7 மணியுடன் கடையை மூடுகின்றனர். இது தொடர்பில் துரித நடவடிக்கை அவசியம்.
இவ்வாறு யாழ்ப்பாண மாவட்ட மூத்த பொலிஸ் அத்தியட்சகரிடம், யாழ்ப்பாண வர்த்தக சங்கப் பிரதிநிதிகள் வலியுறுத்தினர்.
யாழ்ப்பாண நகரில் கடந்த சில நாள்களாக இரவில் இலக்கத் தகடுகள் அற்ற உந்துருளிகளில், முகங்களை மூடியவாறு வாள்களுடன் வரும் கொள்ளையர்கள் வர்த்தக நிலையங்களுக்குள் நுழைந்து கொள்ளையடிக்கின்றனர்.
இரவு 10.00 மணிக்குப் பின்பு பூட்டிய வர்த்தக நிலையங்கள்கூட தற்போது இரவு 7 மணியுடன் இழுத்து மூடும் நிலமை ஏற்பட்டுள்ளதாக யாழ்ப்பாண வர்த்தகர்கள் தெரிவிக்கின்றனர். இது தொடர்பில் வர்த்தக சங்கத்துக்கும் தமது முறைப்பாடுகளை வர்த்தகர்கள் மேற்கொண்டுள்ளனர்.
இதனை யாழ்ப்பாண மாவட்ட மூத்த பொலிஸ் அத்தியட்சகரின் கவனத்துக்கு நேற்றுக் கொண்டு சென்றதாக, வர்த்தக சங்க உபதலைவரும், வடக்கு மாகாணசபை உறுப்பினருமான இ.ஜெயசேகரன் தெரிவித்தார். உரிய நடவடிக்கை எடுப்பதாகப் பொலிஸார் உறுதியளித்துள்ளனர் எனவும் வர்த்தக சங்க உபதலைவர் குறிப்பிட்டார்.
