பதுளை, கொஸ்லாந்த மீரியபெத்தையில் பாதிக்கப்பட்ட மக்களுக்கு உதவுவதற்காக மருத்துவக்குழு உள்ளடங்கலாக 10 பேர் கொண்ட உதவிக்குழு வெள்ளிக்கிழமை (31) பதுளை பிரதேசத்திற்கு செல்லவுள்ளதாக சிவன் மானுட மேம்பாட்டு நிறுவன தலைவர் இ.கலியுகவரதன் இன்று வியாழக்கிழமை (30) தெரிவித்தார்.
இது தொடர்பாக அவர் மேலும் தெரிவிக்கையில்
சிவன் மானுட மேம்பாட்டு நிறுவனத்தின் மூலம் பாதிக்கப்பட்ட மக்களுக்கு உடனடி உதவிகளையும் நிவாரணங்களையும் வழங்குவதற்கு தீர்மானித்துள்ளோம்.
யாழ்ப்பாணத்தில் இருந்து 10 பேர் கொண்ட உதவிக்குழு வெள்ளிக்கிழமை பாதிக்கப்பட்ட பிரதேசங்களுக்கு செல்லவுள்ளனர்.
உடனடி நிவாரணம் வழங்க விரும்புபவர்கள் கொக்குவில் கல்லூரி வீதியில் அமைந்துள்ள சைவ மகாசபை, மாங்குளம் மகா வித்தியாலயத்துக்கு அருகில் அமைந்துள்ள சிவ சற்குருநாதர் ஆச்சிரமம், திருகோணமலையில் அமைந்துள்ள சிவன் மானிட மேம்பாட்டு நிறுவனம், அம்பாறை தம்பிலுவில் உள்ள சைவநெறி கூடம் மற்றும் சுழிபுரம் இவான் வீதியில் இருக்கும் சிவத்தமிழ் மானிட விடியற்கழகத்திலும் தொடர்பு கொண்டு உதவிகளை வழங்கலாம்.
உதவிகள் வழங்குபவர்கள் 0777740958, 0770711152 ஆகிய தொலைபேசி இலக்கங்கள் ஊடாக தொடர்புகொள்ளும்படி அவர் மேலும் கேட்டுக்கொண்டார்.
