சீனாவில் டொல்பின் சூறாவளி பெரும் தாக்கத்தையும் சேதத்தையும் அச்சுறுத்தலையும் ஏற்படுத்தி வரும் நிலையில், ஷாங்காய் நகர் உட்பட கிழக்குப் பகுதிகளிலிருந்து 10 இலட்சத்துக்கும் அதிகமான மக்களை அந்நாட்டு அதிகாரிகள் பாதுகாப்பான இடங்களுக்கு வெளியேற்றியுள்ளதாக தெரிவிக்கப்படுகிறது.
டொல்பின் புயல் காரணமாக பலத்த மழை பெய்து அப்பகுதிகளில் போக்குவரத்து முற்றிலுமாகப் பாதிக்கப்பட்டுள்ளதாகவும் உள்நாட்டு அதிகாரிகள் தகவல் தெரிவித்துள்ளனர்.
இன்று திங்கட்கிழமை (10) ஷாங்காயில் மட்டும் சுமார் 1,000 விமானங்கள் சேவையிலிருந்து இரத்து செய்யப்பட்டுள்ளன.
டொல்பின் புயலின் வீரியம் தற்போது வெப்பமண்டலப் புயலாக குறைக்கப்பட்டிருந்தாலும், வடக்கை நோக்கி நகரும் இப்புயலால் புதன்கிழமை வரை பலத்த மழை, கடுமையான வெள்ளப்பெருக்கு மற்றும் நிலச்சரிவு ஏற்படும் அபாயம் உள்ளதாக அதிகாரிகள் தொடர்ந்து எச்சரித்து வருகின்றனர்.
இந்த ஆண்டில் சீனாவைத் தாக்கிய மிக வலுவான புயலான டொல்பினுக்கு, சீன அதிகாரிகள் முன்னதாகவே ‘சிவப்பு எச்சரிக்கை’ விடுத்திருந்தனர்.
நேற்று ஞாயிற்றுக்கிழமை (9) உள்ளூர் நேரப்படி 17:30 மணிக்கு (09:30 GMT) செஜியாங் மாகாணத்தில் உள்ள யுஹுவான் பகுதியில் இப்புயல் முதன்முதலில் கரையைத் தொட்டபோது, மணிக்கு 150 கி.மீ (94 மைல்) வேகத்தில் பலத்த காற்று வீசியதாக அங்குள்ள வானிலை ஆய்வு மையம் தெரிவித்துள்ளது.
அதனைத் தொடர்ந்து சுமார் ஒரு மணித்தியாலத்துக்குப் பிறகு வென்சோ நகரில் இரண்டாவது முறையாக டொல்பின் சூறாவளி கரையை கடந்தது.
அதன் பின்னர் இன்று ஷான்டாங், ஹெனான், ஹூபெய், அன்ஹுய், ஜியாங்சு, செஜியாங் ஆகிய மாகாணங்களிலும் ஷாங்காய் நகரிலும் கனமழை பெய்யும் என எதிர்பார்க்கப்படுகிறது.
பொதுமக்கள் வெளிநடமாட்டம் மற்றும் வெளிப்புற நடவடிக்கைகளைத் தவிர்க்குமாறு அரசு கேட்டுக்கொண்டுள்ளது. டிஸ்னிலேண்ட் மற்றும் லெகோலேண்டின் சில பகுதிகள் மற்றும் ஷாங்காயின் ‘தி பண்ட்’ பகுதியில் உள்ள பார்வையாளர் தளங்கள் உட்பட பல முக்கிய சுற்றுலாத் தலங்கள் தொடர்ந்து மூடப்பட்டுள்ளன.
சுற்றுலாப் பயணிகள் அதிகம் செல்லும் ஷாங்காயின் பழைய ‘ஃபிரெஞ்ச் கன்செஷன்’ (French Concession) பகுதியில் உள்ள கடைகளின் தரைத்தளங்கள் வெள்ளத்தில் மூழ்கியிருப்பதையும், மக்கள் காலளவு தண்ணீரில் நடந்து செல்வதையும் அரசு ஊடகங்கள் காணொளிகள் மற்றும் புகைப்படங்கள் வாயிலாக எடுத்துக்காட்டுகின்றன.
இந்த இயற்கை அனர்த்தம் காரணமாக செஜியாங் மாகாணத்தின் வென்லிங் பகுதியைச் சேர்ந்த 9 வயது சிறுவன் ஒருவன் கடலில் அடித்துச் செல்லப்பட்டு காணாமல் போயுள்ளதாக அரசு ஊடகங்கள் தெரிவித்துள்ளன. இருப்பினும், அதிகாரப்பூர்வமாக இதுவரை உயிரிழப்புகள் எதுவும் பதிவாகவில்லை எனச் சீன அதிகாரிகள் தெரிவித்துள்ளனர்.
அடுத்த சில நாட்களில் செஜியாங்கின் சில பகுதிகளில் 250 மி.மீ முதல் 500 மி.மீ வரை மழை பெய்யக்கூடும் என வானிலை கணிப்பாளர்கள் தெரிவித்துள்ளனர்.
செஜியாங்கின் தலைநகரான ஹாங்க்சூவில் பலத்த காற்று மற்றும் வெள்ளத்துக்கு இடையே வாகனங்களைப் பாதுகாப்பாக நிறுத்துவதற்காக, அனைத்துப் பொது இடங்களிலும் வாகனக் கட்டணங்களை அதிகாரிகள் இரத்து செய்துள்ளனர்.
செஜியாங் மாகாணத்தின் பிற பகுதிகளில், வென்சோ அதிகாரிகள் சுமார் 9,00,000 மக்களைப் பாதுகாப்பான இடங்களுக்கு இடமாற்றம் செய்து, 1,000-க்கும் மேற்பட்ட அவசரகால முகாம்களைத் திறந்துள்ளனர்.
மேலும், தைஜோ நகரில் சுமார் 3,90,000 பேர் தங்கள் வீடுகளிலிருந்து வெளியேற்றப்பட்டுள்ளனர். கடலோர மாகாணமான புஜியனில் கடல்சார் அதிகாரிகள் பல பயணியர் படகுப் போக்குவரத்தை நிறுத்தி வைத்துள்ளதோடு, 100-க்கும் மேற்பட்ட கடலோர கட்டுமானப் பணிகளையும் இடைநிறுத்தியுள்ளனர். இப்புயல் கரையைத் தொடுவதற்கு முன் 6,000 கி.மீ தூரம் வரை பயணித்துள்ளது. இது ஒரு சாதாரண சூறாவளியின் வேகத்தை விட மூன்று மடங்கு அதிகம் எனச் சீனாவின் அரசு ஒளிபரப்பு நிறுவனமான CCTV தெரிவித்துள்ளது.
