செப்டெம்பர் 20 முதல் 26 வரையான ஒருவார காலம் தேசிய டெங்கு ஒழிப்பு வாரமாகப் பிரகடனப்படுத்தப்பட்டுள்ளது. இதன்போது, டெங்கு ஒழிப்பு துப்புரவுப் பணிகள் நாடளாவிய ரீதியில் முன்னெடுக்கப்படவுள்ளதாக அறிவிக்கப்பட்டுள்ளது.
நாட்டில் மழையுடன் கூடிய காலநிலையைத் தொடர்ந்து, டெங்கு நோய்த்தாக்கம் அதிகரித்துள்ளதாக குறிப்பிடப்படுகின்றது. வடக்கு, கிழக்கு, மலையகம் உட்பட நாட்டின் அனைத்துப் பிரதேசங்களிலும் டெங்கு நோயாளர்கள் இனங்காணப்பட்டுள்ளனர்.
இதனையடுத்து, சுகாதார அமைச்சினால், டெங்குநோய் தொடர்பில் பொது மக்களின் விசேட கவனம் ஈர்க்கப்பட்டுள்ளது. செப்டெம்பர் 06ம் திகதி வரையான காலப்பகுதியில் நாட்டில் மொத்தம் 360 பேர் மரணித்துள்ளதாகவும் 148,898 பேர் டெங்கு நோய்த் தாக்கத்திற்குள்ளாகியுள்ளதாகவும் சுகாதார அமைச்சின் தகவல் தெரிவிக்கின்றது.
கொழும்பு, கம்பஹா, களுத்துறை, குருநாகல், புத்தளம், இரத்தினபுரி, கேகாலை, காலி, மாத்தறை, கண்டி, யாழ்ப்பாணம், மட்டக்களப்பு, திருகோணமலை மற்றும் கல்முனை ஆகிய பிரதேசங்கள் டெங்கு அபாயப் பிரதேசங்களாக சுகாதார அமைச்சினால் கண்டறியப்பட்டுள்ளது.
குறித்த டெங்கு ஒழிப்பு வாரத்தில் சுமார் 3000 குழுக்கள் டெங்கு நுளம்பு ஒழிப்புப் பணியில் ஈடுபடவுள்ளன. ஜனாதிபதி விசேட செயலணி, ஆயுதப் படையினர், சுகாதார திணைக்கள உத்தியோகத்தர்கள் உள்ளிட்ட பல்வேறு தரப்பினர் பணியில் ஈடுபடுத்தப்படவுள்ளனர். வீடுகள், நிர்மாணப் பணிகள் இடம்பெறும் இடங்கள், மத ஸ்தாபனங்கள், பாடசாலைகள் என்பன டெங்கு பரவும் பிரதான இடங்களாக இனங்காணப்பட்டுள்ளன.
காய்ச்சல் இரு நாட்களுக்கு நீடிக்குமானால், அருகிலுள்ள அரச வைத்தியசாலையில் அல்லது தரம் வாய்ந்த வைத்தியரிடம் சிகிச்சை பெற்றுக் கொள்ள வேண்டுமென பொதுமக்கள் அறிவுறுத்தப்படுகின்றனர். அத்துடன், சிகிச்சை பெற்றும் காய்ச்சல் குணமடையாது நீடிக்குமானால் முறையான இரத்தப் பரிசோதனை அவசியமெனவும் டெங்கு தொடர்பில் அலட்சியம் வேண்டாம் எனவும் வலியுறுத்தப்படுகின்றது.
