2025/2026 மதிப்பீட்டு ஆண்டு முதல் சேவை ஏற்றுமதி மூலம் ஈட்டப்படும் வருமானத்திற்கு வரி விதிக்கப்படும் என உள்நாட்டு வருவாய்த் திணைக்களம் அறிவித்துள்ளது.
இருப்பினும், அந்த வருமானத்திற்கு 18, 24, 30 மற்றும் 36 சதவிகிதம் என்ற வழக்கமான வருமான வரி விகிதங்களில் வரி விதிக்கப்படாது என உள்நாட்டு வருவாய்த் திணைக்களத்தின் சிரேஷ்ட பிரதி ஆணையர் ஹிரான் மெனெரிபிட்டிய தெரிவித்தார்.
டிஜிட்டல் ஊடகங்கள் அல்லது பிற முறைகள் மூலம் சேவைகளை ஏற்றுமதி செய்து ஈட்டப்படும் வருமானத்திற்கு அதிகபட்சமாக 15 சதவிகித வரி விதிக்கப்படும் என்றும் அவர் சுட்டிக்காட்டினார்.
அதன்படி, டிஜிட்டல் ஊடகங்கள் மூலம் வருமானம் ஈட்டும் தனிநபர்கள், சுய மதிப்பீட்டு வரி அறிக்கை மூலம் தங்களது வருமானத்தை முறையாகச் சமர்ப்பிக்க வேண்டும் என அவர் வலியுறுத்தினார்.
சாதாரண வருமானத்தின் மீது விதிக்கப்படும் வரி விகிதங்களுடன் ஒப்பிடுகையில், சேவை ஏற்றுமதி மூலம் ஈட்டப்படும் வருமானத்திற்கு குறைந்த வரி விகிதமே பொருந்தும் என்றும், டிஜிட்டல் ஊடகங்கள் உட்பட பல்வேறு முறைகள் மூலம் சேவை ஏற்றுமதியிலிருந்து வருமானம் ஈட்டும் தனிநபர்களே 15 சதவிகித வரியைச் செலுத்தும் பொறுப்பைக் கொண்டுள்ளனர் என்றும் ஹிரான் மெனெரிபிட்டிய மேலும் தெரிவித்தார்.
