நாடு முழுவதிலும் உள்ள இலங்கை போக்குவரத்து சபையின் (SLTB) டிப்போக்களில் ஒப்பந்த அடிப்படையில் சாரதி மற்றும் நடத்துனர் பதவிகளிலுள்ள 1,037 வெற்றிடங்களை நிரப்புவதற்காக விண்ணப்பங்கள் கோரப்பட்டுள்ளன.
இந்த ஆட்சேர்ப்பு நடவடிக்கையின் கீழ் 788 சாரதி வெற்றிடங்களும் 249 நடத்துனர் வெற்றிடங்களும் நிரப்பப்படவுள்ளதுடன், அந்தந்த பிரதேசங்களைச் சேர்ந்த விண்ணப்பதாரர்களுக்கு முன்னுரிமை அளிக்கப்படும்.
விண்ணப்பிப்பதற்கான தகுதிகள்:
-
சாரதி பதவி:
-
வயது எல்லை: 21 முதல் 45 வயதிற்குள் இருக்க வேண்டும்.
-
கல்வித் தகுதி: கல்விப் பொதுத் தராதர சாதாரண தரப் பரீட்சையில் இரண்டு திறமைச் சித்திகள் (Distinction) உட்பட ஆறு பாடங்களில் சித்தியடைந்திருக்க வேண்டும்.
-
சாரதி அனுமதிப்பத்திரம்: செல்லுபடியாகும் கனரக வாகன ஓட்டுநர் அனுமதிப்பத்திரத்தைப் பெற்று 3 வருடங்களுக்கு மேல் அனுபவம் கொண்டிருக்க வேண்டும்.
-
குறித்த உடல் மற்றும் சுகாதாரத் தேவைகளையும் பூர்த்தி செய்திருக்க வேண்டும்.
-
-
நடத்துனர் பதவி:
-
வயது எல்லை: 18 முதல் 45 வயதிற்குள் இருக்க வேண்டும்.
-
கல்வித் தகுதி: கல்விப் பொதுத் தராதர சாதாரண தரப் பரீட்சையில் கணிதம் மற்றும் தாய்மொழி உட்பட இரண்டு திறமைச் சித்திகளுடன் (Credit pass) ஆறு பாடங்களில் சித்தியடைந்திருக்க வேண்டும்.
-
சம்பளம் மற்றும் ஏனைய கொடுப்பனவுகள்:
தேர்ந்தெடுக்கப்படும் சாரதிகளுக்கு மாதாந்த அடிப்படை ஒப்பந்தக் கொடுப்பனவாக ரூ. 40,847 மற்றும் நடத்துனர்களுக்கு ரூ. 40,008 வழங்கப்படும். இதனுடன் மேலதிகமாக ரூ. 17,800 வாழ்க்கைச் செலவுக் கொடுப்பனவு, கூடுதல் நேரக் கொடுப்பனவு (Overtime) மற்றும் ஊக்குவிப்புக் கொடுப்பனவுகளும் வழங்கப்படும்.
ஊழியர்கள் ஊழியர் சேமலாப நிதியத்திற்கு (EPF) 8% பங்களிப்பை வழங்குவதுடன், முதலாளி (SLTB) 12% பங்களிப்பை வழங்குவார். மேலும், ஊழியர் நம்பிக்கைப் பொறுப்பு நிதியத்திற்கு (ETF) முதலாளி 3% பங்களிப்பை வழங்குவார் என இலங்கை போக்குவரத்து சபை தெரிவித்துள்ளது.
ஆட்சேர்ப்பு மற்றும் சேவை நிபந்தனைகள்:
நேர்முகப்பரீட்சை, செய்முறைத் தேர்வு மற்றும் பொருத்தமான பயிற்சிப் பாடநெறிகளின் முடிவுகளின் அடிப்படையிலேயே ஆட்சேர்ப்பு இடம்பெறும். நியமனத்தின் பின்னர் பணிபுரியும் இடத்தை மாற்ற முடியாது என SLTB தெரிவித்துள்ளது.
தேர்ந்தெடுக்கப்படும் விண்ணப்பதாரர்களுக்கு அவர்களின் பணிபுரியும் இடத்திலிருந்து 30 கிலோமீற்றர் சுற்றளவிற்குள் பயணிக்க பயண அனுமதிப்பத்திரங்கள் (Travel permits) வழங்கப்படும்.
விண்ணப்பிக்கும் முறை:
குறிப்பிடப்பட்ட மாதிரிப் படிவத்திற்கு அமைவாக தயாரிக்கப்பட்ட விண்ணப்பங்களை பதிவுத் தப்பால் மூலம் செப்டம்பர் 7, 2026 ஆம் திகதிக்கு முன்னர் கிடைக்கும் வகையில் பின்வரும் முகவரிக்கு அனுப்பி வைக்க வேண்டும்:
முதன்மை நிறைவேற்று அதிகாரி (Chief Executive Officer),
இலங்கை போக்குவரத்து சபை,
இலக்கம் 200, கிருல வீதி, நாரஹேன்பிட்ட, கொழும்பு 05.
கடித உறையின் மேல் இடது மூலையில் விண்ணப்பிக்கும் பதவி மற்றும் மாவட்டம் தெளிவாகக் குறிப்பிடப்பட வேண்டும். நேர்முகப்பரீட்சையின் போது விண்ணப்பதாரர்கள் தங்களது பாடசாலை விலகல் சான்றிதழைச் சமர்ப்பிக்க வேண்டும். அரைகுறையாகப் பூர்த்தி செய்யப்பட்ட அல்லது குறிப்பிட்ட மாதிரிப் படிவத்திற்கு அமைய இல்லாத விண்ணப்பங்கள் நிராகரிக்கப்படும்.
